Inawat ti Philippine Army dagiti 76 a baro a naikomisyon nga opisiales ti PMA “TALANG DANGAL” Class 2026 iti maysa a dinner reception nga inangay idi May 16 iti Ion Hotel, Legarda Road, Baguio City. Ti okasion ket pinangulowan ni Lieutenant General Antonio G. Nafarette, Commanding General ti Philippine Army.
Naindaklan a panangipasangbay ti Army leadership kadagiti baro a Second Lieutenants a sumrek iti opisial a korps ti kasoldaduan. Ti programa ket nangipakita iti panagbalin dagiti kadete manipud iti panagadal agingga iti pormal a serbisyo babaen iti simboliko a pannakaited kadakuada dagiti ATM cards ken umuna a set dagiti uniporme ti opisial.
Iti mensahe ni LtGen Nafarette, binilinna a tuloy-tuloy ti panangpasayaat ti Philippine Army iti operational readiness ken panangala iti moderno nga assets ken teknolohiya tapno mapabileg pay ti kakayahan ti pwersa militar. Kinunana pay a dagiti baro nga opisiales ket masapul a nakasagana iti nadumaduma a karit iti agdama a panawen.
“…the battles we face today are no longer confined to the traditional battlefield… As future leaders of the Philippine Army, you must be ready to meet these challenges with competence, discipline, and a mindset that is ready to evolve with the times,” kinuna ni LtGen Nafarette
Impakdaarna met a saan laeng a tradisional a gubat ti sangsangoen ti militar ita, nudiket pakairamanan dagiti moderno ken nagbabaliw a banta iti seguridad. Gapuna, pinalagipanna kadagiti baro a Second Lieutenants a masapul a maaddaanda iti kinamanakem, disiplina, ken kapasidad a makiangay iti agbaliw a sitwasion.
Ti aktibidad ket nangipakita iti pormal a pannakasimrek dagiti baro nga opisiales iti Philippine Army ken iti responsibilidad a kaibat ti panagserbi iti pagilian. Naiparangarang met ditoy ti napigsa a pannakikadua ti Philippine Military Academy ken ti Philippine Army iti panangisagana kadagiti opisiales a makaammo iti leadership, operasyon, ken propesional a serbisyo.
Source: Mountain Beacon
Photos by: OACPA & OSPMA
