BINNADANGAN ken pinadayawan ti City Government of Baguio dagiti personnel ti Management Information and Technology Division (MITD) gapu iti naindaklan a kontribusionda iti panangidur-as ti digital governance ken panagbalbaliw ti serbisio publiko babaen iti teknolohiya. Babaen iti panangited ti Certificate of Commendation, napadayawan da Francis L. Camarao, Information Technology Officer II; Joannah Christen B. Vinoya, Quality Analyst; ken Jarren T. Balageo, Associate Software Developer, gapu iti kinasiput, dedikasion ken kinaeksperto da iti panangsuporta kadagiti inisyatibo ti siudad iti digital transformation.
Nangipakita dagiti awardees iti naindaklan a papel iti panangipangulo iti panangimoderno ken panangidur-as ti Baguio In My Pocket Plus (BIMP+) platform, maysa a nagtitimpuyog ken interoperable a digital system a naaramid tapno mapapintas ken mapapartak ti pannakaipaay dagiti serbisyo ti gobyerno kadagiti umili, turista ken bisita iti siudad.
Babaen iti panagtinnulong, kinaammo iti teknolohiya ken panagserbi a naipakita da, napabileg ti kakayahan ti BIMP+ a mangted iti ad-adda a nalaka, nalag-an ken people-centered a serbisyo, a mangsuporta iti panggep ti siudad a nasirib ken nasungbat a panag-gobyerno.
Ti nagun-od da ket mangiparangarang iti agtultuloy a panagpursige ti City Government of Baguio iti inobasion ken kinaurnos iti panagserbi iti publiko iti daytoy a digital a panawen.
Naipaay ti Certificate of Commendation babaen kenni Mayor Benjamin Magalong, Vice Mayor Faustino Olowan, kadagiti kameng ti city council ken dadduma pay nga opisial ti siudad iti Flag Raising ken Awarding Ceremony idi Mayo 11, 2026 idiay Baguio City Hall.
Source: Baguio PIO
