Nagtultuloy ti panangipaay ti suporta ti Provincial Government of La Union (PGLU) kadagiti nadumaduma a grupo a makikadua ti lokal a gobierno iti panangpapigsa ti panagkaykaysa ken panagmaymaysa dagiti komunidad.
Idi Hunyo 1, 2026, nangited ti PGLU kadagiti agarup 65 a grupo iti monoblock chairs ken tables a mausarda kadagiti aktibidad, miting, ken dadduma pay a programa dagiti asosasyon, pagadalan, ken entero a komunidad.
Iti panangidalan ni Governor Mario Eduardo C. Ortega, ni Vice Governor Eric O. Sibuma, ken dagiti Board Members, naiparang ti nasao a kagamitan kadagiti 41 a pagadalan, 23 a Civil Society Organizations (CSOs) a pakairamanan dagiti grupo dagiti mannalon, kooperatiba, asosasyon dagiti senior citizens, youth groups, ken OFW family circles, kasta met iti Bureau of Jail Management and Penology (BJMP) – San Fernando City Jail.
Iti mensahe ni Governor Ortega, inyamananna dagiti grupo gapu iti napudno a panagserbi da iti komunidad. Kinunana a nupay simple laeng dagitoy a kagamitan, simbolo met laeng dagitoy ti agtultuloy a panagbiag ti PGLU iti wagas tapno matulungan dagiti grupo a mapapintas pay ti serbisioda iti publiko.
Kabayatanna, pinalagipan met ni Vice Governor Sibuma dagiti benepisiario a salimetmetanda dagiti naited a kagamitan ken saan a mabain a dumawat iti sabali pay a tulong manipud iti Kapitolyo no masapulda iti sumaruno nga aldaw.
Impasigurado ti PGLU ti panagtultuloy na a suporta kadagiti organisasion ken institusion a mangisusulong iti panagrang-ay ken kinapigsa dagiti komunidad iti entero a probinsia ti La Union.
Source: PGLU LA Union
