Nadadael dagiti uppat a kubo iti WOW Sulvec Beach idiay Barangay Sulvec, Narvacan, Ilocos Sur kalpasan a dinuprak ti napigsa nga angin a naigiddan iti napigsa a tudo.
Segun iti Narvacan Police Station, naikkat ken nadadael dagiti uppat a kubo, idinto a naiwaras iti lugar dagiti piraso ti kawayan, materyales iti bubong, ken dadduma pay a debris.
Nupay kasta, awan met ti nadangran wenno natay iti napasamak.
Kabayatanna, dagus met a naisayangkat ti clearing operations babaen kadagiti pannakabagi ti linteg ken dagiti maseknan nga ahensia tapno madalusan dagiti nagkaiwara a debris ken masigurado ti kinatalged ken tapno madalanan ti lugar.
Agtultuloy a mabalbalakadan ti publiko nga agannad gapu iti awan sarday a tudo ken napigsa nga angin.
Source: Bombo Radyo Vigan
