Pormalen a narugian ita nga aldaw ti Underground Cable Wiring System Project idiay Plaza Burgos, Vigan City babaen iti naisayangkat a groundbreaking ceremony.
Ti seremonia ket indaulwan ni Mayor Randy Singson kaduana ni Vice Mayor Atty. Glendale Benzon ken dagiti miembro ti 9th City Council.
Dimmar-ay pay da Ilocos Sur Vice Governor Ryan Luis V. Singson, dagiti miembro ti Sangguniang Panlalawigan, Provincial Administrator Marlon Tagorda kas mangibagi ken ni Governor Jeremias “Jerry” Singson, dagiti opisial ti Laser Builders Corporation, dagiti department head ti siudad ken dagiti barangay captain.
Iti pannaki-uman ti Bombo Radyo Vigan ken ni Mayor Singson, dakkel a pagyamananda a nairugin ti proyekto ta ti gagemna daytoy ket mapasayaat ti langa ti siudad ta maikkatton dagiti nakabitin a linya ti koriente ken telecommunication.
Kabayatanna, pinasingkedan met ni Governor Ryan Singson nga awan ti ginastos ditoy ti Local Government Unit no di ket adda laeng ti resolusyon wenno ordinansa a kinasapulan a maipasa.
Ti proyekto ket kalpasan ti napermaan a Memorandum of Agreement idi Marso 17, 2026 iti nagbaetan ti city government ken Laser Builders Corporation tapno ipatungpal ti Ordinance No. 20, Series of 2025 wenno ti Underground Cabling and Wiring System Ordinance of the City of Vigan.
Source: Bombo Radyo Vigan
