Naipasinayaan idi Hunyo 8, 2026 ti Transition Learning Center ti Tuguegarao West Central School kasabay ti panaglukat ti School Year 2026-2027 idiay siyudad ti Tuguegarao.
Pinangulohan da Bise Gobernador Manuel Mamba ken Mayor Maila Ting-Que ti pannakapasinaya ti nasao a pasilidad a dinaloan met dagiti opisial ti lokal a gobyerno, mannursuro, nagannak, ken adu a estudiante a mangipakita iti suporta iti panangitag-ay ti inclusive education.
Ti Transition Learning Center ket maysa a pasilidad a naisagana para kadagiti estudiante nga addaan iti espesyal a kasapulan iti edukasion (special education needs) tapno maipaay kadakuada ti nasaysayaat ken umno a lugar para iti panagadal. Malaksid kadagiti akademiko nga adal, maisuro met kadagiti ubbing dagiti naibatay a kasanayan iti biag kas iti panagluto, panaglaba, panagdalus, ken dadduma pay a pagrebbengan iti inaldaw a panagbiag. Impaganetget met ni Bise Gobernador Mamba ti kinapateg ti edukasion ken ti adbokasiya a “No Child Left Behind” para iti pagimbagan ti tunggal ubing.
Ti panggep ti pannakaitakder ti Transition Learning Center ket tapno maipaay ti patas a gundaway iti edukasion dagiti ubbing nga addaan iti espesyal a kasapulan, mapadur-as dagiti kabaelanda ken kasanayanda iti biag, ken masigurado a awan ti ubing a mabaybay-an iti pannakaala ti nasaysayaat a masakbayan.
Source: Cagayan PIO
