LAOAG CITY – Inpakaammo ni Mr. Danilo Agulay, Market Master ti Batac City Public Market nga adda ti sumurok 130 nga stalls ti naminpinsan a nadadael kalpasan ti pannakauram ti nasao a tiendaan.
Segun kenkuana, karaman a nauram ti Imee Building, Main Building ken ti Karinderia Building.
Inbatadna a malaksid kadagitoy ket karaman pay a nauram ti SUV, L3 ken kurong-kurong pakairamanan dagiti motorsiklo dagiti stall owners.
Kunana a manarimaan ti pannakikoordinar dagiti staff-na kadagiti naapektaran ti uram tapno maala dagiti nagian a produkto dagiti stall.
Inlawlawagna nga adda ti sumagmamano a sayangguseng a mangmangngeganna nga adda ti nanggandat nga agtakaw ngem awan met ti opisial a report maipanggep iti daytoy a banag.
Innayonna nga adda ti sumurok 400 nga stall owners ti nakarehistro iti Batac City Public Market.
Maipalagip a kuna ni Fire Senior Inspector Hendriech Gudoy, City Fire Marshal ti Bureau of Fire Protection iti siudad ti Batac a nangrugi ti uram iti dry goods section no sadinno a masarakan dagiti grocery, paglakoan ti bagas ken dagiti karinderia.
Source: Bombo Radyo Laoag
