Agtultuloy ti naiget a panagbantay ken panangipaay ti seguridad ti Philippine National Police (PNP) para kadagiti nangato a lider ken delegado manipud iti nagduduma a pagilian a nangrugin a simmangpet ditoy pagilian para iti Association of Southeast Asian Nations (ASEAN) Summit.
Segun iti panangidaulo ti PNP iti babaen ni PGen Jose Melencio C. Nartatez Jr., nakapueston amin a naituding a puersa kadagiti eropuerto, kangrunaan a kalsada, hotel, ken kadagiti lugar a pakaangayan dagiti taripnong tapno masigurado ti natalged ken naannayas a panaggaraw dagiti heads of state ken dadduma pay a VIP.
Kadua ti PNP ti Armed Forces of the Philippines (AFP), Philippine Coast Guard (PCG), ken Metropolitan Manila Development Authority (MMDA) iti panangipatungpal iti komprehensibo a security plan, pakairamanan ti panangidestino kadagiti security escorts, route security, ken 24/7 nga intelligence monitoring.
Pinasingkedan met ti nailian a pulisya a nagtalinaed a naka-full alert ti hanayda ken nakasagana dagiti emergency response teams tapno makaresponde a dagus iti aniaman a situasion bayat a maang-angay ti historikal a taripnong.
​Kagiddan daytoy, umaw-awag manen ti PNP iti publiko a makipagkaykaysa kadagiti autoridad, sumurot kadagiti maipatpatungpal a traffic rerouting, ken ipakaammo a dagus ti aniaman a mapagduaduaan a garaw iti aglawlawda.
