​Pinasingkedan ti Philippine National Police (PNP) iti babaen ti panangidaulo ni PGen Jose Melencio C. Nartatez Jr., Chief, PNP, a nakasaganan amin a kasapulan nga addang ken puersa tapno masigurado ti seguridad, kinatalna, ken kinatalged ti publiko ken dagiti delegado para iti umay nga Association of Southeast Asian Nations (ASEAN) Summit.
​Segun iti panangidaulo ti nailian a pulisya, rinibu a tauhan ti maiwaras kadagiti kangrunaan a lugar a pakaangayan dagiti taripnong, kadagiti ruta a pagnaan dagiti convoy, ken kadagiti hotel a pagyanan dagiti lider ti pagilian ken dadduma pay a nangato nga opisial.
Malaksid iti pisikal a kaadda dagiti pulis kadagiti kalsada, pinapigsa pay ti PNP ti intelligence monitoring, cyber-security measures, ken pannakikammayetda kadagiti dadduma nga ahensia ti gobierno kas iti Armed Forces of the Philippines (AFP), Philippine Coast Guard (PCG), ken Metropolitan Manila Development Authority (MMDA).
Kagiddan daytoy, umaw-awag ti PNP iti publiko a makipagkaykaysa ken agbalin a nasalukag. Maal-allukoy dagiti umili nga ipakaammo a dagus iti kaasitgan nga estasion ti pulisya ti aniaman a mapagduaduaan a garaw wenno banag iti aglawlawda, ken planuen a nasapa dagiti biaheda tapno maliklikan ti pakasingaan iti manamnama nga idadagsen ti trapiko.
