Maysa a tulong-pinansial a naggatad iti ₱5,000 ti maawatto ti tunggal maysa kadagiti 3,000 a mannalon iti mais iti Nueva Vizcaya manipud iti Pamahalaang Panlalawigan, iti babaen ti panangidaulo ni Gov. Jose “Jing” Gambito. Panggep daytoy a makatulong kadagiti mannalon a maapektaran ti panagtangken ti daga ken panagkurang ti danum gapu iti El Niño.
Segun kenni Provincial Social Welfare and Development Office (PSWDO) Officer Flordelinda Granada, kadawyan a dagiti mannalon iti pagay ti umuna a maitedan iti tulong. Nupay kasta, inrekomenda ti Provincial Agriculture Office (PAGRO) a mairaman met dagiti mannalon iti mais tapno matulongan ida iti panangsalaknib iti pagbiagan da.
Siguraduen ti pamahalaang panlalawigan a maibingay ti ₱5,000 a tulong iti tunggal kwalipikado a mannalon sakbay a malpas ti tawen 2026. Itatta, maileppas pay laeng ti panangpasingked iti opisial a listaan dagiti benepisiario.
Iti panangibaga ni Granada, dagiti mannalon nga addaan iti sangkabassit a daga a pagmulaan ti mais, a sangarup a kagudua ti ektarya wenno basbassit pay, ti umuna a maitedan iti tulong. Daytoy ket tapno maipaay ti suporta kadagiti ad-adda a kasapulan ti tulong.
Namnamaen a makatulong ti nasao a pondo a mangpabassit iti epekto ti panagtangken ti daga wenno El Niño iti pagbiagan dagiti mannalon. Impakaammo met ti pamahalaang panlalawigan a mabalin a mairaman dagiti mannalon iti high-value crops iti maited a kapada a tulong iti sumaruno a tawen.
Source: DWRV1233.Official (https://www.facebook.com/share/p/1A2np1fGiB/)
