Kinumpirmar ti Philippine National Police (PNP) Atok iti Bombo Radyo nga agtuloy inton bigat ti ipatpatungpal nga Search and Rescue Operation ti Atok Municipal Disaster Risk Reduction and Management (MDRRM), Bureau of Fire Protection (BFP), Barangay Cattubo, Atok Municipal Police Station (AMPS), ken dagiti pappamilya, kabagyan, ken volunteers ti mapukpukaw a ni Mr. Rogelio Sawey, maysa a senior citizen ken agdama nga agnanaed idiay Botiao, Cattubo, Atok, Benguet.
Sigun iti MDRRMO, saanen a naimatangan ni Sawey iti pagnanaedanna manipud idi Agosto 30. Nakakandado met ti ridaw daytoy ngem apaman a linukatanda ti pagtaenganna, nakitada nga adda pay laeng ti bag na iti uneg a naglaon kadagiti personal a kagawaanna a planona nga ipan idiay La Trinidad.
Gapu iti daytoy a report, dagos a naipatungpal ti initial nga initiatiba tapno masarakan ni Sawey ngem saanda daytoy a nasarakan isu’t gapunna a naiyuman daytoyen kadagiti otoridad.
Apaman a naawatda ti opisyal a report, timmulong metten ti Atok MDRRMC-Operations Center kadua dagiti kameng ti Atok Municipal Police Station, Atok Fire Station, ken Barangay Cattubo Officials.
Naactivate metlaeng ti Municipal Search and Rescue Response Cluster and BDRRMC-Barangay Response Teams.
Mannarimaan metten ti panangicoordinate ti Municipal Operations Center iti maisaysaysangkat nga search operation.
Kidkiddawen met ti Atok Municipal Disaster Risk Reduction and Management (MDRRM) iti publiko nga ipakaammoda kadagiti otoridad nu adda dagiti impormasyon da seknan iti nasao a biktima.
Kabayatanna, iti naipatungpal a rescue operation itay kanikadua, impetteng ni Vice Mayor Edward Beliano ti kinapateg ti panangpatalinaed iti buddy-buddy system kabayatan iti operasyon.
Napalagipan metlaeng amin a responders nga agtalinaed nga agbalin nga alerto, obserbaranda ti umno a koordinasyon, ken ipangpangrunada ti bukod da a seguridad bayat iti pannakitinnulongda iti nasao nga operasyon.
Impeksa met ti Atok PNP nga agtuloy inton bigat ti operasyon para iti pannakasarak ti nasao a senior citizen.
Soure: Bombo Radyo Baguio
