Tapno matulungan dagiti pagadalan iti panagsagana para iti umay a panaglukat ti klase, nangited ti Provincial Government of La Union (PGLU) iti nasurok a Php12.1 milyon a tulong pinansyal para iti Brigada Eskwela dagiti nadumaduma a publiko a pagadalan iti entero a probinsya.
Ni Governor Mario Eduardo C. Ortega ken dagiti miembro ti Sangguniang Panlalawigan ti nangidaulo iti pannakaited dagiti pondo kadagiti principal ken program coordinators idi Mayo 28, 2026 iti Speaker Pro Tempore Francisco I. Ortega Convention Center idiay City of San Fernando, La Union.
Ti tinawen a pannakaited ti tulong pinansyal kadagiti pagadalan ket mangipakita iti agtultuloy a suporta ti PGLU iti sektor ti edukasion, nangruna iti panangpasayaat kadagiti pasilidad dagiti eskuelaan ken panangsungbat kadagiti kangrunaan a kasapulan dagitoy tapno mapatibker ken mapangato pay ti kalidad ti edukasion iti probinsya.
Nakaawat ti La Union Schools Division Office (LUSDO) iti Php10,625,000.00, bayat a ti City of San Fernando Schools Division Office (CSF SDO) ket nakaawat iti Php 1,000,000.00. Naisagana met ti Php500,000.00 para kadagiti benepisiario ti Alternative Learning System (ALS) Program iti daytoy a tawen.
Agtultuloy a makabenepisio iti daytoy a programa dagiti 425 a publiko a pagadalan iti La Union, pakairamanan dagiti elementarya, sekondaria, integrated schools, ken 40 ALS districts iti entero a probinsya.
Kaduana kadagiti immay iti aktibidad da ni LUSDO Superintendent Dr. Jorge Reinante, CSF SDO Superintendent Dr. Shiela Marie Primicias, ken dadduma pay a opisial ti edukasion. Nakipasit met dagiti Board Members a da Gerard Ostrea, Atty. Ernesto Rafon, Joyce Abuan, ken Teresita Garcia.
Naipakita ti dakkel a rag-o ken panagyaman dagiti mannursuro iti pannakaawatda iti daytoy a tulong, gapu ta dakdakkel a banag daytoy iti panangpasayaat ken panangsagana kadagiti pagadalan sakbay ti panaglukat ti klase iti sumaruno a school year.
Source: PIA La Union
Panulat ni IlocanoAk
