Nagtultuloy nga naideklarar a “insurgency-free” ti probinsia ti Nueva Vizcaya iti panangrugi ti tawen 2026, segun iti Philippine Army iti naisayangkat a 1st Quarter Meeting ti Joint PPOC-PADAC-PTF ELCAC idi Pebrero 20, 2026 iti Ammungan Hall, Capitol Compound, Bayombong.
Impakaammo dagiti otoridad a natalged ken natalna pay laeng ti sitwasyon ti probinsia maipapan iti insurhensiya.
Sigun kenni Col Rhoderick Parallag, Commander ti 502nd “Liberator” Brigade, awan ti nabaliwan iti disposisyon dagiti pwersa ken awan pay ti naireport a kaso wenno aktibidad dagiti makakaliwang grupo iti Nueva Vizcaya. Inyebkasna nga awanen ti natda a bakas wenno remnants ti nabuwag a Komiteng Rehiyon–Cagayan Valley iti probinsia.
“Remnants na lang ng dismantled KRCV ang kino-confront natin sa Region 2. Mayroong apat na remnants ng KRCV sa boundary ng Quirino, Isabela, at Aurora,” inbagan ni Col Parallag.
Nalagip a naideklarar a insurgency-free ti Nueva Vizcaya idi 2025, kalpasan ti naurnos ken napasnek a kampanya ti gobyerno kontra iti rebelyon. Iti agdama, intuloy dagiti otoridad ti panangpapigsa iti operasion ken panagkaykaysa kadagiti lokal a pamay-an ken komunidad tapno masigurado a saan a makabangon manen dagiti nabuwag a grupo iti Rehion Dos.
Iti sabali a banag, inawagan ni Gobernador Jose Gambito dagiti Higher Education Institutions (HEIs) iti probinsia a mangipakat iti napigsa a panangsalaknib kadagiti estudyante kontra iti impluwensiya dagiti makakaliwang grupo. Kinunana a mas ad-adu ti oras a igugugol dagiti agtutubo iti uneg ti pagadalan ngem iti pagtaengan, isu a napateg ti papel dagiti eskuelaan iti panangidalan ken panangsalaknib kadakuada.
“I urge you to exercise utmost prudence to protect your students, mas marami oras ang mga estudyante sa loob ng paaralan kaysa sa mismong tahanan,” kinuna ni Gov. Gambito.
Nagkari met dagiti administrasion ti Nueva Vizcaya State University, Saint Mary’s University, PLT College Incorporated, ken Aldersgate College a managtalinaed a mapagmatmatyag, nangruna kadagiti aktibidad dagiti student organization.
Impasigurado met ti Nueva Vizcaya Police Provincial Office a papigsaenda pay ti panagmonitor iti aniaman a posibleng aktibidad ti rebelde iti uneg dagiti pagadalan, ken dagus a rumuar ti akion no adda man mabigbig a banta iti seguridad ti probinsia.
Source: DWRV1233.Official
