Maysa a baket iti nasarakan nga awanen iti biagna iti taltalon idiay Barangay Pantay Laud, Vigan City, Ilocos Sur idi kalman, April 11, 2026 iti 6:40PM.
Ti nasarakan ket agtawen iti pitopulo ket dua, naasawaan, mannalon nga agnaed idiay Barangay Pantay Laud, Vigan City.
Nakaawat ti Vigan City Police Station ti pakaammo maipanggep ti pannakakita ti maysa a baket nga awanen iti biagna iti taltalon iti asideg ti Barangay Road iti nasao a barangay isu nga insigida a nagresponde dagiti otoridad.
Segun ti maysa nga agindeg, bayat a magmagna idi kalman iti malem iti nasao a kataltalonan tapno mapan koma ti pagtartaraknanna iti baboy idin nakitana ti baket a nakaidda iti laud a paset iti pagtaraknanna iti baboy isu a pinakaammoanna iti pamilia ti biktima.
Kinuna ti apona a naginom ti lolana iti pagtaenganda sakbay a pimmanaw iti pagtaenganda iti alas onse iti bigat idi kalman.
Naammoan a naadik iti arak ti baket ken agsagsagaba iti hypertension ken idi laeng kallabes ket nai-confine iti Ilocos Sur Provincial Hospital-Gabriela Silang.
Naipan ti baket iti ospital ngem naideklarar a dead on arrival.
Source: Bombo Radyo Vigan
