Inpakaammo ni Mayor James Bryan Alcid nga agtultuloy a ngumatngato ti mapaspastrek ti City Government iti Laoag City Public Market and Commercial Complex. Daytoy ket mangipakita iti nasayaat a panagtakder ti ekonomia ti siudad, nangruna iti sektor ti komersio ken serbisio.
Sigun kenkuana, adda ti naisagana a business review nga maaramid iti daytoy a bulan wenno iti umuna a lawas ti bulan ti Abril tapno masukimat ti agdama a takbo ti negosyo ken mapagtibker pay ti panangipatungpal kadagiti programa a mangsuporta iti lokal a komersio.
Inlawlawag ni Alcid a no kitaen ti rekord idi 2024 agingga 2025, nagtalinaed a tumaas iti agarup 500 a ribu a pisos ti kita, a nangrugi laeng iti parking fees ti nasao a pasilidad. Kunana a daytoy ket mangipakita iti dumakkel a bilang dagiti sumrek ken aggatang iti merkado.
Source: Bombo Radyo Laoag
