Inilunsad ti Integrated Bar of the Philippines (IBP) Baguio-Benguet Chapter ti maysa a Libre a Legal Clinic idiay La Trinidad Municipal Park kas paset ti panangselebrar ti Strawberry Festival iti ili ti La Trinidad.
Ti programa ket nangrugi idi Marso 15, 2026 ken agtultuloy agingga Marso 31, 2026, ken bukas iti publiko inaldaw manipud 9:00 iti bigat agingga 5:00 iti malem. Maikari dagiti umili ken bisita ti festival a mapan idiay sango ti Tourism Building idiay municipal park tapno agawat iti libre a legal consultation ken notarial services para kadagiti simple nga affidavit ken sabali pay a dokumento a saan a pang-komersyo.
Segun kenni Atty. Melani V. Zarate, maysa kadagiti volunteer lawyer iti nasao a programa, ti Free Legal Clinic ket paset ti programa ti Supreme Court of the Philippines a maawagan Unified Legal Aid Service, nga agtalinaed a mangted kadagiti abugado iti gundaway a mangipaay iti libre a serbisyo legal iti publiko kas panagserbi iti komunidad.
Imbaga ni Atty. Zarate a dakkel ti maited daytoy a programa kadagiti tattao, nangruna kadagiti awan iti kabaelan a mangala iti pribado nga abogado. Inkarigatna pay a saan koma nga agbain dagiti tattao a lumapit ken agsaludsod kadagiti problema da iti linteg gapu ta libre daytoy ken nakasagana dagiti abogado a tumulong.
Iti maikadua nga aldaw laeng ti operasyon ti Free Legal Clinic, naka-serbi dagiti volunteer lawyers iti agarup 20 agingga 24 a tattao nga nangkonsulta kadagiti nadumaduma a legal a pakasaritaan. Inaasahan a dumakkel pay ti bilang dagiti agpa-konsulta bayat ti panagtultuloy ti selebrasyon ti Strawberry Festival.
Iti sabali a bangir, impakita met ti Municipal Government of La Trinidad ti tuloy-tuloy a panangsuporta kadagiti kasta a programa ken panagtinnulong a mangiparang-ay iti pannakaammo ti publiko maipanggep iti linteg ken mangiyasideg iti serbisyo legal iti komunidad.
Source: DZWT 540 AM – News & Information
