“An-anuen ti napintas a kalsada no malnourish met ti magmagna!” – motto iti probinsiya iti Ifugao a rason a maysa kadagiti kangrunaan a pokus ti lokal a gobierno iti benneg ti panagdur-as ket ti panangpasayaat iti salun-at ken nutrisyon dagiti umili kangrunaan na dagiti ubbing.
Gapu iti dayta ket napagtalinaed ti probinsiya ti Ifugao ti nasayaat nga estado daytoy kas “Best Implementer” iti nadumaduma a programa mainaig iti nutrisyon iti intero a rehiyon Cordillera.
Segun kenni Ms. Bella Basalong, Regional Nutrition Program Coordinator iti National Nutrition Council Cordillera, aktibo unay ti Local Nutrition Committee sadiay Ifugao manipud iti lebel iti probinsiya aginggana iti barangay ket ammo da no ania dagiti programa maipapan iti nutrisyon.
Impannakkel na pay a maibasar kadagiti naipatpatungpal a “validation” ket adda iti espasyo para iti nutrisyon iti amin a barangay. Amin dagiti Punong Barangay ket ammo da dagiti programa iti nutrisyon a rumbeng a maipatungpal iti masakupan da.
Kas panangbigibig iti dakkel nga akem dagiti Barangay Nutrition Scholars, ket adda iti maipapa-ay nga insentbo kadakuada. Uray dagiti agretiro a BNS ket adda met laeng ti maited a kanayunan nga insentibo depende iti bilang iti tawen a panagserbi iti maysa a BNS.
Maysa kadagiti “best practices” iti nasao a probinsiya ket ti regular a monitoring ken evaluation iti programa no sadino ti Provincial Nutrition Council/ Action Officer ti agturong iti barangay tapno kitaen no ania dagiti kurang ken mabalin a maitulong iti PLGU.
Gapu kadagitoy a programa iti LGU ket nagresulta iti nababa a kaso wenno prevalence iti malnutrisyon iti intero a probinsiya ti Ifugao.
Kabayatan na, sumarsaruno met iti Baguio City kadagiti kapintasan iti programa na iti benneg iti nutrisyon, maikatlo ti probinsiya iti Benguet, ken iti Kalinga, Apayao, Abra, ken kaudian iti Mountain Province.
Source: DZWT 540 AM – News & Information
