BAGUIO CITY – Impaganetget ni Wilson Bumay-et Jr., Presidente ti Baguio-Benguet Jeepneys Federation, a saanda a naragsak iti agtultuloy a panagngato ti presio ti lana iti agdama isut gapuna a kidkiddawenda ti kanayunan a plete maipapan iti nasao nga isyu.
Iti pannakiuman ti Bombo Radyo, imbinglayna a nangipiladan iti petision para iti kanayunan a P2 iti LTFRB-Cordillera ngem ur-urayenda paylaeng ti pinal a pangngeddeng iti ahensiya.
Impettengna a numan pay adda ti P10 a fuel discount para kadagiti jeepney drivers, saan nga amin a gasolinaan ti makaipaay iti daytoy ken limitado laeng iti agarup 150 litro tunggal yunit tunggal lawas.
Imbinglayna pay a tallo laeng a gasolinaan ti agdama ti credited a mangted iti nasao a diskwento.
Iti agdama, suksukimatenda pay ti rason nu apay a saan a naaprobaran ti dadduma a drayber a nagaplikar para iti fuel subsidy.
Sigun kenkuana, pagbasaranda ti panagngato ti presio iti lana iti sumaruno nga aldaw sakbay a mangrugi ti panagsarita maipapan iti posibilidad ti voluntary a pamasahe, a pakairamanan ti LTFRB, local government unit ken barangay iti siudad.
Kabayatanna, imbinglayna pay a saanda a mangisayangkat iti tignay-protesta para iti State of the Nationa Address ni President Ferdinand Marcos Jr ita nga aldaw gaputa patienda a saan a daytoy ti umno a solusion iti pakaseknanda.
Source: Bombo Radyo Baguio
