Indauloan ni Governor Edgar Aglipay, a makilala kas “Manong Egay,” ti groundbreaking ceremony para iti makasaysayan a panangipatakder ti monumento ni dating senador Juan Ponce Enrile idiay Brgy. San Jose, Gonzaga, Cagayan. Ti okasyon ket maysa a pannakaipakita iti panangrespeto ken panangilala ti probinsya iti kontribusion ni Enrile iti pagserbian a publiko ken iti pagilian.
Naitungpal ti seremonia kadua da Mayor Rellie Dalmaceda ti Gonzaga, MayorNelson Robinion ti Sta. Ana, Mayor Licerio Antiporda ti Buguey, Dominador Dayag ti Aparri, ken Mayor Rodrigo De Gracia ti Sta. Teresita, kadua dagiti dadduma pay a municipal ken barangay officials iti lugar. Naipakita iti daytoy ti panagkaykaysa dagiti lider iti panangiparang-ay iti kultura ken pakasaritaan ti Cagayan.
Inyebkas met ti panagyaman ni Katrina Ponce Enrile, Administrator ken CEO ti Cagayan Economic Zone Authority (CEZA), iti pannakaiparang-ay ti daytoy a proyekto. Kuna na a dakkel a karangalan iti pamilya ken kadagiti Cagayano ti pannakaibingay ti respeto ken panangilala iti legasiya a binati ni JPE iti serbisio publiko ken ayat iti pagilian.
Iti mensahe na, impaganetget ni Gov. Aglipay dagiti naisangsangayan a kontribusion ni Enrile saan laeng a kas abogado no di ket kas maysa a Cagayanong lingkod-bayan a nagserbi kas Senate President, Philippine National Defense Minister, ken Presidential Legal Counsel. Inulit na met ti kinaimportante ti panagkaykaysa ken panagayat iti ili tapno maipatuloy dagiti nasayaat a programa ken tuloy-tuloy a progreso para iti entero a Probinsya ti Cagayan.
Source: Cagayan PIO
