Pinnirmaan ni La Trinidad Mayor Roderick Awingan ti Executive Order No. 162, Series of 2026 wenno ti nainget a pannakaipawil ti panangiyuneg, ken panangidulin kadagiti smuggled a natnateng idiay La Trinidad Vegetable Trading Post (LTVTP) ken iti merkado publiko ti nasao a munisipyo.
Sigun iti nasao a direktiba, mabilbilin metlaeng amin a market supervisors a mangipatungpal iti regular ken random inspection kadagiti amin nga umun-uneg a lugan kasta metlaeng kadagiti stalls iti uneg ti merkado publiko.
Malaksid iti dayta, nabilin metlaeng dagitoy a mangberipikar ti nagapuan ken dokumento dagiti shipments.
Naikan met iti bileg dagiti otorisado a personnel a dagos a mangkumpiska kadagiti mapagduaduaan ken nakumpirma nga imported a nateng.
Kabayatanna, dagiti met matiliwan a naglabsing iti nasao a direktiba ket madusa babaen iti pannakarevocate dagiti karbenganda a mangilako ken mapatawan iti kaso a pananglabsing iti Republic Act No. 12022 wenno ti Anti-Agricultural Economic Sabotage Act.
Kanayonanna, mangbukel ti La Trinidad iti Quick Response Desk (QRD) idiay La Trinidad Vegetable Trading Post ken Municipal Agriculture Office para kadagiti report ken reklamo maipapan iti smuggled vegetables ken dadduma pay a maimatangan a pananglabsing iti uneg ti munisipyo.
Dagos met a maiturong dagiti makumpiska kadagiti otoridad wenno maidispose da kas maitunos iti standard environmental ken health regulations ti nasao a munisipyo.
Courtesy: La Trinidad Public Information Office
