Nakipaset iti duwa nga Cagayano a rescuers iti Emergency Fire and Rescue Exchange Training a naisayangkat iti Fujian Province, China, a nangrugi idi naglabas a lawas ken mapatpatingga inton Mayo 21, 2026.
Kabilang kadagiti nakipaset da Rueli Rapsing, focal person ti Provincial Disaster Risk Reduction and Management Office (PDRRMO), ken iti dati a Municipal DRRM Officer ti Tuao, Cagayan a ni Warren Turo.
Inadal dagiti rescuer iti umno a panangresponde babaen kadagiti aktibidad iti training a kas iti earthquake response, water rescue, rope rescue, ken dadduma pay a specialized search and rescue operations.
Naipakita pay iti aktuwal a simulation dagiti sitwasyon ti uram, layus, ken dadduma a sakuna, ken naawatan da ti kinapateg ti moderno a disaster preparedness infrastructure ken ti napardas a centralized emergency management system ti China a mangted dagus a koordinasyon ken epektibo a mobilisasyon iti oras ti emerhensia.
Babaen kadagiti amin a naadal ken naeksperiensiaan iti nasao a training, mas mapapigsa ti kinasagana ken kakayada dagiti Cagayano a rescuer iti panangresponde iti aniaman a sakuna. Dagitoy a kaammo ken kasanasan ket maipakatda iti aktuwal a serbisyo tapno mapardas ken maurnos ti panagresponde, ken tapno maprotektaran dagiti biag ken sanikua dagiti umili.
Iti panagserbi da iti Rehiyon 2, ipakat da amin dagitoy a nasayaat a praktis tapno agbalin a mas epektibo, mas napigsa, ken mas naan-anay ti disaster response system iti rehiyon.
Source: Cagayan Public Information Office
