AGOO, La Union – Nagtitinnulong dagiti partisipante ken advocacy partners iti nasapa a bigat idiay Agoo Eco Park para iti “Bisig-Kleta and Fun Run” a inorganisa ti Regional Alternative Child Care Office (RACCO) Region I kas paset ti panangselebrar iti Adoption and Alternative Child Care Week 2026.
Adda tema a “Love Makes a Family,” ti aktibidad ket nagbalin a plataporma tapno maiparangarang a ti pamilia ket saan laeng a mabukel babaen iti dara wenno panagkaputot, no di ket babaen iti panagayat, panangtaripato, ken panangipaay iti natalged ken nadungngo a pagtaengan para kadagiti ubbing.
Babaen iti daytoy a sports advocacy event, ti National Authority for Child Care (NACC) ken RACCO Region I ket manggep a burasen ti stigma ken dakes a panagkitkita kadagiti saan a biyolohikal a pamilia, ken ipakaammo iti publiko a dagiti amin a ubbing ket maikari iti maysa a legal, natalged, ken naayat a pamilya.
Naiparangarang met iti aktibidad dagiti nalaklaka a legal a solusyon para kadagiti pamilya a Pilipino, a kas iti napasayaat a proseso ti adoption para kadagiti solo parents ken ti Simulated Birth Rectification Act (SIBRA), a mangted dalan iti pannakatarimaan dagiti rekord ti pannakaiyanak.
Babaen iti pannakipaset iti panagtaray ken panagbisikleta, impakita dagiti kameng ti komunidad ti suporta da iti kampanya a mangitag-ay iti kinapudno a ti panagayat ken panangtaripato, saan a ti dara laeng, ti pudno a pundasyon ti maysa a pamilya.
Ti aktibidad ket mangipakita iti tuloy-tuloy a panagtrabaho ti NACC ken RACCO-I iti panangsigurado a tunggal ubing ket adda gundawaya a dumakkel iti maysa a natalged, legal, ken naayat a pagtaengan.
Source: PIA La Union
