Nakipaset ti Bureau of Fire Protection (BFP) Region 2 iti panagselebrar ti Philippine Arbor Day 2026 nga addaan iti tema a “Luntiang Bukas: Arbor Day 2026,” a naangay babaen iti Department of Environment and Natural Resources (DENR) idi Hunyo 25, 2026 idiay DENR Regional Office, Carig Sur, Tuguegarao City, Cagayan.
Pinanguluan ti Department of Environment and Natural Resources (DENR) ti nasao nga aktibidad a nakipasetan dagiti nadumaduma pay nga ahensia ti gobyerno kas PNP ken BJMP ken stakeholders a nangipakita iti pannakitinnulongda iti panagmula ti kayo ken panangsalaknib iti aglawlaw.
Naimula iti okasion ti tallopulo ken siam (39) species of indigenous trees a mangisimbolo iti maika-39 nga anibersario ti Kagawaran.
Ti panagmula dagiti kayo ket mangipakita iti nagkaykaysa a panagtrabaho dagiti ahensia ken komunidad iti panangpreserbar iti aglawlaw ken panangitag-ay iti responsableng panangaywan iti kinabaknang ti daga.
Babaen iti panangidaulo ni FSSUPT Victoria Agbayani Domingo, DSC, Regional Director, agtultuloy ti BFP Region 2 iti panangsuporta kadagiti programa a mangsalaknib iti aglawlaw.
Ti panggep ti daytoy nga aktibidad ket tapno mapapigsa ti pannakaammo ti publiko iti kinapateg ti panagmula ken panangtaripato kadagiti kayo, panangpreserbar iti aglawlaw, ken panangpataud iti natalged, nalinis, ken nasustinar a masakbayan para kadagiti umili.
Source: Cagayan Valley Region BFP R2
