Nagballigi a nadiskubre ti nailemmeng nga arm cache ti kalaban idi Enero 16, 2026, iti Sitio Naganakan, Barangay Aridawen, Sta. Teresita, Cagayan, babaen iti operasyon ti 17th Infantry Battalion (17IB), partikular ti Headquarters Company ken Intelligence Section da.
Naisayangkat ti operasyon iti pannakipagkaykaysa ti 201st Community Defense Center (CDC) ti 2nd Regional Community Defense Group (2RCDG), RESCOM, Philippine Army, ken ti 203rd Maneuver Company ti Regional Mobile Force Battalion 2 (RMFB2). Dakkel met ti naited a tulong dagiti umili ti lugar, a pinangulowan ni Barangay Captain Hon. Jhonny Corpuz, a nangipakita iti pannakipagtrabaho ken ti panagtalek iti otoridad.
Kadagiti nasarakan a kagawaan ti gubat ket dua (2) a rifle grenades, dua (2) a improvised pistols, tallopulo (30) a bala ti .30 caliber M2, innem (6) a bala ti 5.56mm, ken maysa (1) a bandolier. Ti pannakasamsam dagitoy ket maibilang a dakkel a banag tapno maliklikan ti mabalin a panganib iti biag dagiti sibilyan ken mapagtalinaed ti kinatalna iti komunidad.
Sigun kadagiti otoridad, ti daytoy nga operasyon ket mangipakita iti napigsa nga ugnayan, pannakipagkaykaysa, ken panagtalek iti nagbaetan dagiti institusyon ken ti umili. Saan laeng a mangliklik iti posibleng didigra daytoy, no di ket mangited met iti namnama para iti natalged a pagnaedan, agtultuloy a kaunlaran, ken nauneg a kapia iti probinsia ti Cagayan.
