Ang Pilipinas, Estados Unidos at Japan ay nakipagsosyo sa isang pakikipagsapalaran na magpapalakas ng koneksyon sa pagitan ng mga pangunahing hub ng ekonomiya ng bansa.
Sa magkasanib na pahayag kasunod ng trilateral meeting ngayong araw, Abril 12, 2024 sa Washington, D.C., ipinakilala ng mga lider ng tatlong bansa ang unang Partnership for Global Infrastructure and Investment Corridor sa Indo Pacific.
“Ngayon ay ilulunsad natin ang Luzon Economic Corridor, na susuporta sa connectivity ng Subic Bay, Clark, Manila, at Batangas sa Pilipinas,” ayon sa joint statement ng tatlong bansa.
Sa pamamagitan ng koridor na ito, nangangako ang Japan, Pilipinas, at Estados Unidos na pabilisin ang mga coordinated investments sa mga proyektong imprastraktura na may mataas na impact.
Kabilang sa mga proyektong ito ang rail, ports modernization, clean energy at semiconductor supply chains at deployments, agribusiness at civilian port upgrade sa Subic Bay.
Matagal nang sinusuportahan ng Japan ang koneksyon sa lugar na ito, kabilang ang mga riles at kalsada, sa pamamagitan ng Japan International Cooperation Agency (JICA).
Balak din ng US International Development Finance Corporation na magbukas ng regional office sa Pilipinas upang mapadali ang karagdagang pamumuhunan sa buong Pilipinas.
Ayon sa pahayag, ang Luzon Corridor ay pagpapakita ng pinahusay na kooperasyong pang-ekonomiya ng tatlong bansa, na nakatuon sa paghahatid ng mga nasasalat na pamumuhunan sa iba’t ibang sektor.
Katuwang din ang Japan, Pilipinas, at Amerika para mapalawak ang kooperasyon at pamumuhunan sa iba pang lugar ng Pilipinas.
