Personal na iniabot ni Department of Social Welfare and Development Field Office 2 Regional Director Lucia Alan ang Certificate of Appreciation na iginawad ni Kalihim Rex Gatchalian para sa munisipalidad ng Delfin Albano, sa pamumuno ni Mayor Arnold Edward Co, noong ika-14 ng Agosto 2023.
Isa ang lokal na pamahalaaan ng Delfin Albano sa tatlong LGU mula sa Rehiyon Dos na ginawaran ng nasabing sertipikasyon bilang pagkilala sa kanilang natatanging kontribusyon para sa implementasyon ng Pantawid Pamilyang Pilipino Program (4Ps).
Kabilang dito ang pag-sponsor ng Delfin Albano sa kauna-unahang nationwide graduation noong ika-11 ng Pebrero 2020. Kinilala rin ang dedikasyon ng LGU sa pagsuporta sa 4Ps sa lokal na antas at gayundin ang pagsisikap na maisakatuparan ang mga probisyon ng RA 11310, partikular sa pagbibigay prayoridad at komprehensibong serbisyo sa mga pamilyang nagtapos sa programa.
Sa kanyang mensahe, ipinahayag ni Mayor Co na “patuloy ang suporta ng lokal na pamahalaan ng Delfin Albano sa mga programa ng DSWD lalo na sa 4Ps upang matulungan pa ang ating mahihirap na kababayan na umangat ang estado ng kanilang buhay.”
Kasama ni Mayor Co sina Bise Mayor Thomas Pua Jr., Sangguniang Bayan members, Municipal Social Welfare and Development Officer Rosalie Marquez, at mga kawani ng LGU Delfin Albano na naging saksi sa pagtanggap ng nasabing parangal.
Source: DSWD Region II
