Tinanggap ni John Carlo Manzano, Presidente ng Youth for Peace (YFP)- Cagayan Chapter ang Gawad Claude Andrews Award 2022 sa Cagayan State University-Andrews Campus Convention Center, Tuguegarao City noong Hunyo 27, 2022.
Ayon kay Manzano sa ginanap na screening at interview ay ang layunin ng YFP ang naging dahilan upang makakuha siya ng mga puntos at naging isa sa mga tumanggap ng Gawad Claude Andrews Award 2022.
Sa kanyang paglahad, sinabi niya na ang pagpapahalaga bilang kabataang bolunterismo ay may mahalagang aspeto upang maging kaisa ng bansa tungo sa pagbuo ng mga programa para sa kabataan at kapayapaan.
Ipinaabot din ni Manzano ang kanyang pasasalamat sa mga kapwa miyembro ng YFP kung kaya’t nabuo niya ang mga programa tulad ng Green Minded Program – isang aktibidad sa kapaligiran, Community Peace Symposium, YOUTHnited, at Youth Leadership Summit (YLS) para itaguyod ang kamalayan hinggil sa mapanlinlang na recruitment ng Communist Party of the Philippines-New People’s Army National Democratic Front.
Ang awardee ay nagtapos ng YLS noong taong 2021 at naging aktibong miyembro at opisyal ng YFP noong Pebrero ng 2022.
Kinatawan din niya ang 501st Brigade sa nakaraang Leadership Challenge na ginanap sa Camp Melchor F Dela Cruz at unti-unting naging isa sa mga opisyal ng 5ID YFP Officers.
Bukod dito, kasalukuyang kumukuha si Manzano ng Bachelor of Science in Education Major in Filipino sa Cagayan State University-Andrews Campus.
Ipinaabot din ni Manzano ang pasasalamat sa mga tauhan ng Philippine Army. Aniya ang pagsali sa mga organisasyon sa ilalim ng Philippine Army ay ang pinakamaganda niyang nagawa dahil nahubog nito ang kanyang sarili.
Hinikayat din ni Manzano ang mga kabataan na sumali sa anumang aktibidad na makatutulong sa kanilang mga kapwa kabataan at Cagayano upang maiwasan at malayo sila sa impluwensya ng Communist Terrorist Group.
Source: Youth for Peace Cagayan
