​Nangipaay ti pammadayaw ken komendasion ni Atty. Ralph Calinisan, NAPOLCOM Commissioner, kadagiti operatiba ti Taguig City Police Station gapu iti napardas a panagrespondeda ken kinatured kalpasan a nakipaginnarmasda kadagiti armado a riding-in-tandem a tulisan idiay Barangay Ususan, Taguig City idi Nobiembre 12, 2026.
​Segun iti opisial, ti dagus a tignay ken dedikasion iti pagrebbengan dagiti nagresponde a pulis ket pammaneknek iti natibker a panagtakder ti kapulisan tapno mataginayon ti kappia ken kinatalged dagiti residente iti siudad.
Impaganetget ni Atty. Calinisan a saan a nagduadua dagiti pannakabagi ti linteg a nangitaya iti bukodda a biag tapno malapdan ti krimen ken masigurado a saanen a makabiktima pay dagiti suspek iti komunidad. Gapu iti daytoy, nairekomenda ti pormal a pannakabigbig ken komendasion para kadagiti nairaman a pulis kas pammadayaw iti kinabannuarda.Kabayatanna, impalagip met ti panangidaulo iti publiko nga agtalinaed a nasalukag iti aglawlawda ken ipakaammo a dagus iti kaasitgan nga estasion ti pulisya ti aniaman a mapagduaduaan a garaw tapno maaksionan a dagus dagiti autoridad.
