Nagtitinnulong dagiti aglaklako, empleado ti Baguio City Public Market, ken nagduduma a ahensya ti gobierno idi Miyerkules ken Huebes tapno mapagtalinaed ti kinadalus ken kinatalged ti merkado, bayat ti panangitag-ay iti nasayaat, nalinteg, ken nalawag a panagtransaksyon iti negosyo.
Idi Miyerkules, nagtitipon dagiti aglaklako iti merkado iti kuarta tapno agupa iti serbisyo ti panangted iti danum. Inaramat dagiti empleado ti Public Market daytoy tapno hugasan ken dalusan dagiti kalsada a pagiparparikna-an dagiti produkto a kasla karne ti manok ken lames iti nasapa a bigat.
Idi simmaruno nga aldaw, nangaramid iti panagsukimat dagiti empleado ti Public Market Division Office ken Department of Trade and Industry (DTI) iti timbangan ti maysa nga establisimyento iti Kayang 2nd Road, kalpasan ti reklamo a naipablaak iti social media.
Nasarakanda a nasayaat ti kasasaad ti timbangan ngem saan a nasayaat ti panangiset na. Pinalagipanda ken pinaywanan ti akinkukua ti establisimyento a maipakita ti umiso a presyo dagiti produkto sigun iti dagsen dagitoy tapno masigurado a husto ti bayad dagiti konsyumer ken mapagtalinaed ti kinapudno, kinatarnaw, ken nalinteg a panagnegosyo.
Kasta met idi Huebes, nagtitipon iti pondo dagiti aglaklako iti Wagwagan tapno gumatang kadagiti materiales a kasapulan dagiti empleado ti City Building and Architecture Office (CBAO) para iti panangsukat iti nasunog a circuit breaker iti asideg ti kangrunaan nga electrical meter a mangted iti suplay ti kuryente iti lugar da iti Hilltop Road.
Source: Baguio City Public Information Office
