Nangrambak ti gobierno ti Baguio City iti pannakagun-odna iti Gold Category Award iti 2026 ASEAN Smoke-Free Award (ASA), babaen iti seremonial a panangisuko iti award bayat ti programa ti panagwagwag ti bandera idiay City Hall idi Oktubre 26, 2026.
Imbabaon ni Southeast Asia Tobacco Control Alliance (SEATCA) Executive Director Dr. Ulysses Dorotheo ti award kadagiti opisyal ti siudad ken kameng ti Smoke-Free Baguio Task Force a pinanguluan ni Mayor Benjamin Magalong. Daytoy ket mangipakita iti napaut ken agtultuloy a panagregget ti siudad iti panangipatungpal kadagiti pagannurotan maipanggep iti panangkontrol iti tabako, pananglapped iti promosyon dagiti produkto ti tabako ken panangitag-ay iti natalged ken nasalun-at a pagnanaedan nga awan ti asok ti sigarilyo. Naawat a pormal ti award idi Septiembre 10, bayat ti 17th ASEAN Health Ministers Meeting and Related Meetings idiay Kuala Lumpur, Malaysia, babaen ken ni Public Order and Safety Division (POSD) Chief Daryll Longid a mangibagi iti gobierno ti siudad.
Naipateg ti Baguio City gapu iti agtultuloy a pannakaipatungpal ti City Ordinance No. 34, s. 2017, wenno ti Smoke-Free Baguio Ordinance, babaen iti napigsa a panangkontrol iti panagusar, panaglako ken panagpromote kadagiti produkto ti tabako. Daytoy ket resulta ti nagtitinnulong a trabaho dagiti opisina ti gobierno ti siudad, barangay, pribado a sektor ken boluntario. Inyebkas ni Mayor Magalong ti panagyaman iti pannakagun-od ti daytoy a pammadayaw, a mangpabileg iti komitment ti siudad a mangituloy iti programa para iti natalged ken nasalun-at a komunidad, nangruna iti panangsalaknib iti salun-at dagiti ubbing ken amin a residente.
Impakaammo a pormal ni Lao PDR Ministry of Health Cabinet Director General Dr. Bounxou Keohavong ti pannakaawat dagiti nagballigi iti nasao a parangal. Ti Lao People’s Democratic Republic ti mangidadaulo iti ASEAN Smoke-Free Awards, a kaduana ti SEATCA ken ASEAN Secretariat. Nakaawat iti Silver Award ti George Town, Penang, Malaysia, bayat a ti Bronze Award ket naited kadagiti siudad ti Depok, Indonesia; Kuala Lumpur, Malaysia; Thanbyuzayat Township, Mon State, Myanmar; Pasig City, Philippines; ken Maha Sarakham, Thailand. Nakaawat met ti Singapore iti Special Recognition for Smoke-Free Enforcement. Ti ASEAN Smoke-Free Award ket impasdek idi 2022 tapno mapabileg dagiti siudad, munisipalidad ken probinsia iti ASEAN a mangipatungpal kadagiti pagannurotan para iti smoke-free ken vape-free nga aglawlaw, babaen iti kampanya ti publiko ken pannakaituray kadagiti produkto ti tabako ken vape. Idi damo a pannakaipaay ti award idi Agosto 8, 2024, bayat ti 16th ASEAN Health Ministers’ Meeting idiay Vientiane, Laos, ti Iloilo City ti nagun-od iti Gold Category Award.
Source: Baguio City Public Information Office
