Impeksa dagiti coach ti Dojo Kaizen ti kinapateg ti nainget a panagsagana dagiti atleta, nangruna kadagiti kompetisyon a pakipaspasetan dagitoy.
Ti Dojo Kaizen ket maysa a gym a pagsansanayan dagiti atleta a makipaspaset kadagiti nagduduma a martial arts tournaments iti Cordillera ken iti entero a pagilian.
Sigun kenni Coach Delfin “The Hulk” Nawen, napateg a rugian dagiti atleta iti panagadal kadagiti basic techniques tapno maipaganetget ti nasayaat a pundasyonda iti martial arts.
Kalpasan a ma-master dagitoy dagiti kangrunaan a skills, maisuro met kadagiti sumarsaruno a training dagiti advanced techniques, cardio exercises, ken strength training programs tapno mapapigsa ti pisikal a kabaelan dagiti atleta.
Naipaganetget met a saan laeng a ti panangadal kadagiti teknik ti napateg iti martial arts, nu di ket ti disiplina, konsentrasyon, ken panagtultuloy a panagpraktis tapno nasaysayaat ti panangaramidda kadagiti kompetisyon.
Nupay adda dagiti gundawa nga adda dagiti rigat ken pannakaupay a masango dagiti atleta, kanayonda ida a pabilgen dagiti coaches tapno agtultuloyda iti panagsanay.
Sigun met kenni Coach Kenneth “Mini Kong” Banasan, kanayonanda a mangipapaay iti balakad ken inspirasyon kadagiti atleta tapno mapagtalinaedda ti interes ken kinatibker ti nakemda iti panagsanay.
Inlawlawagna pay a saan laeng a ti pisikal a panagsagana ti masapok a tutokanda, no di ket karaman metlaeng ti panangpabileg iti moral ken mental a kasasaad dagiti atleta tapno nasaysayaatda a mangsango kadagiti karit iti sports.
Impeksa pay dagiti coaches a napateg kadakuada ti kinatalged dagiti atleta iti amin a panawen ti panagsanay. Siguraduenda a dagiti ehersisyo ken training activities ket maitutop iti edad ken kabaelan dagiti atleta tapno maliklikan dagiti saan a kasapulan a pannakadangran.
Kabayatanna, ginuyogoyda dagiti agtutubo a makipaset kadagiti martial arts no addaanda iti interes ken passion iti nasao nga sports.
Kinunana met kadagiti nagannak a napateg ti panangsuporta ken panangipabileg kadagiti annakda, nangruna iti panangipakita kadagiti positibo a kababalin a kas iti disiplina, respeto, ken panagtalek iti bukod a kabaelan.
Naipaganetget met a babaen iti nasayaat a panangiwanwan dagiti coach ken suporta dagiti nagannak, mabalin a mapadur-as dagiti atleta saan laeng iti sports, no di ket uray iti panagbiagda iti inaldaw.
Source: Bombo Radyo Baguio
