Sangapulo ket lima a barangay iti Nueva Vizcaya ti nakaawat iti baro a 4×4 six-wheeler dump truck a gatad ti Php45 milyon, kas maikadua a batch ti programa ti Provincial Government. Pinanguluan ni Gov. Atty. Jose V. Gambito, Vice Gov. Eufemia Dacayo, ken dagiti miembro ti Sangguniang Panlalawigan ti turnover ceremony idi Oktubre 21, 2026, iti People’s Stage ti Kapitolio.
Dagiti nakaawat a barangay ket naggapu kadagiti ili ti Santa Fe, Kasibu, Bayombong, Aritao, Alfonso Castañeda, Villaverde, Dupax del Norte, Diadi, ken Ambaguio. Tunggal dump truck ket addaan iti libre a tallo a tawen a rehistrasyon iti Land Transportation Office (LTO), third-party liability ken comprehensive insurance. Adda met GPS nga addaan iti tallo a tawen a subscription, warning lights, public address system, ken touchscreen stereo.
Segun kenni Gov. Gambito, panggep ti probinsia a maitedan ti bukod a dump truck ti tunggal barangay iti Nueva Vizcaya. Babaen iti daytoy a programa, mapalaka dagiti trabaho iti panangtarimaan kadagiti kalsada, panagawit kadagiti materiales, panagdalus iti aglawlaw, ken panangtulong kadagiti emergency, a di kasapulan ti agpaabang kadagiti kagamitan wenno agdepende iti tulong dagiti dadduma nga ahensia.
Idi napalabas a tawen, adda met a 20 a dump truck ti naipamudmod a naggatad iti P60 milyon. Iti nagan dagiti benepisyario a barangay, inyebkas ni Sinapaoan Punong Barangay Samuel Agmallo ti panagyaman iti Provincial Government ken ti namnama a maituloy pay dagiti programa a mangipaay iti tulong kadagiti barangay.
Inlawlawag met ni Vice Gov. Dacayo a ti nasayaat a panagtitinnulong dagiti miembro ti 12th Sangguniang Panlalawigan ket nakatulong iti pannakaaprobar dagiti programa a mangipaay iti benepisio kadagiti umili. Babaen iti daytoy a panagtitinnulong, namnamaen a mapapigsa ti kapasidad dagiti barangay a mangserbi kadagiti umili, nangruna iti panangtarimaan kadagiti pasilidad ken kalsada, panangsalimetmet iti kinadalus ti aglawlaw, ken panangipaay iti napardas a tulong kadagiti kasapulan ti komunidad.
Source: DWRV1233.Official (https://www.facebook.com/share/p/1A2HacFqTF/)
