Nakemmeg ti maysa a babai gapu iti pananglimlimona iti maysa a negosiante ken panangalana iti P7,500 babaen iti mobile money transaction idiay Barangay Pacis, Sinait, Ilocos Sur.
Ti biktima ket maysa a babai nga agtawen iti tallopulo ket maysa, owner iti tiendaan ti nasao a barangay.
Iti pannaki-uman ti Bombo Radyo Vigan ken ni PMAJ. Bryan Lopez, nagpammarang a customer ti suspek ken nagkiddaw nga agpa-cash in iti P7,500 iti maysa a mobile number a nainagan ken ni Charlie S.
Kalpasan a maipatulod ti kuarta ken maipakita ti kumpirmasion ti transaksion.
Ngem imbes a bayadan a dagus koma ti suspek ket adu dagiti impampambarna agingga a nakaala ti gundawayna nga aglibas ngem nalapdan daytoy ti ikit ti biktima.
Nabayag a kinapatpatangda ti suspek tapno mabayadanna koma ngem inaminna nga awan ti kuartana a pangbayad iti transaksion.Maghanap ng Biyahe
Innayon ni Lopez nga adun dagiti transaksion ti suspek idi pay laeng kallabes ta ti modusda ket makiam-ammoda kadagiti tattao ket agtalinaeddanto iti gayyemenda agingga a makapanglimlimoda babaen iti Gcash.
Naipan iti suspek iti Sinait Municipal Police Station tapno mangipilada iti kaso.
Source: Bombo Radyo VIgan
