Kinumpirmar ti Benguet Police Provincial Office a naiparikeppen ti tunnel portal idiay Dalicno, Ampucao, Itogon, Benguet itay agsapa.
Daytoy ket kasaruno iti ipupusay ti pito nga indibidual gapu iti mapapati a gas poisoning iti uneg ti nasao a tunnel.
Sigun iti pannakisarita ti Bombo Radyo kenni PMAJ Edwin Sergio, Public Information Officer ti Benguet Provincial Police Office, imbinglayna a personal a nagturong ni Benguet PPO Director PCol. Dionisio D. Bonoy iti mismo a portal para iti permanente a pannakaisara wenno pannakasemento ti entrance ti nasao a tunnel.
Kadua dagitoy dagiti kameng ti Itogon Municipal Police Station nga idadauloan ni PCPT Brett Allen Ande, Itogon Municipal Disaster Risk Reduction and Management Office Engr. Batcagan, Mines and Geosciences Bureau nga idadauloan ni Engr. Santiago Bugnosen, opisyales iti Barangay Ampucao, ken sumagmamano a residente a timmulong a nangsemento iti opening ti nasao a tunnel.
Sigun kenni Sergio, permanenten ti pannakairikkep ti nasao a portal. Impeksana metlaeng nga adda ti planoda nga aginspek kadagiti dadduma a tunnel ngem iti agdama, daytoy pay laeng ti nakitada a kasapulan a maiparikkep.
Source: Bombo Radyo Baguio
