Agarup 100 a mula ti Narra ken Kawayan ti immula dagiti miembro ken opisyales ti Maaliguas Pangasinan Real Estate Board, Inc. (MPREB) iti City Tree Park idiay Brgy. San Vicente, Alaminos City, Pangasinan, ita nga Oktubre 3, 2026.
Ti nasao nga aktibidad ket paset ti Corporate Social Responsibility (CSR) ti organisasion a mangipakita iti panangipategda iti panangsalaknib iti aglawlaw ken panangtaripato kadagiti natural a kinabaknang.
Nakipagkaykaysa met iti panagmula dagiti miembro ti Rotary Club of Alaminos City, babaen iti panangimaton ni SAO Gester I. Tolentino ti City Agriculture Office, a mangtamtaming iti Adopt-A-Mountain Project.
Iti panangidalan ni MPREB President Ms. Connie Juguilon, naipakita ti napateg a papel dagiti pribado nga organisasion iti panangsuporta kadagiti programa ti lokal a gobierno, nangnangruna iti panangsalaknib iti aglawlaw.
Babaen iti kasta a panagtitinnulong, manamnama a mapasayaat pay ti kinaberde ti aglawlaw, maprotektaran dagiti natural a kinabaknang, ken maipatawid ti nasaysayaat ken nadalus nga aglawlaw kadagiti sumaruno a kaputotan.
Source: LGU Alaminos
