Pinagtibker ti City Government of San Fernando, La Union ti panangitag-ay iti karbengan ken pagimbagan dagiti Persons with Disabilities (PWDs) babaen iti pannakapirma ti Memorandum of Agreement (MOA) iti nagbaetan ti City Government ken Lorma Colleges ita Setyembre 29, 2026.
Ti pannakapirma ket paset ti Disability Summit on Inclusive Governance a naangay iti Speaker Pro Tempore Francisco I. Ortega Convention Center iti daytoy a siudad.
Babaen iti MOA, maipatungpal ti Community-Based Rehabilitation (CBR) para kadagiti PWDs iti intero a siudad. Ti CBR ket maysa nga estratehiya iti pannakapasayaat ti komunidad a mangitandudo iti inklusion, rehabilitasion, ken patas a gundaway para kadagiti PWDs.
Segun iti World Health Organization (WHO), ti CBR ket nakasentro kadagiti lima a kangrunaan a benneg salun-at, pagbiagan, edukasion, pannakapabileg, ken pannakairaman iti sociedad.
Kinuna ni Mark Anthony B. Inocencio, PDAO Head, a ti estratehiya ti summit ket naisentro iti pannakapasayaat dagiti programa iti edukasion, salun-at, ken disaster risk reduction and management.
Babaen iti daytoy a panagtinnulong, panggep ti City Government ken Lorma Colleges a mangipaay iti ad-adu pay a gundaway ken serbisyo a mangpabileg kadagiti PWDs ken mangsigurado iti naan-anay a pannakairamanda iti komunidad.
SOURCE: PIA La Union
