SAGUBO, KAPANGAN – Nasarakanen ti 29-anyos a lalaki a napukaw sadiay Barangay Sagubo, Kapangan Benguet idi Setiembre 03, 2026.
Nabigbig ti biktima a ni Raul Aludos Juan, awanan asawa ken residente iti nasao a barangay.
Iti eksklusibo a pannakiuman ti Bombo Radyo Baguio iti kasinsin ti biktima a ni Ms. Maribel Sagandoy, kinunana a nasarakan ti biktima iti karayan a paset ti sitio Sagilic, Kaliwaga, Barangay Gaswiling sadiay Kapangan idi Setiembre 07, 2026.
Sigun kenni Sagandoy, nagturong ti biktima iti karayan tapno agbanniit iti ikan ngem maatap a naiyanud gapu iti napigges nga ayus ti danum.
Naisayangkat ti inisyal a search operation babaen kadagiti opisiales ti nasao a Barangay ngem saanda a nabirukan.
Gapu iti dayta, pasado 12:00 p.m idi Setiembre 5, naireport ti insidente iti Kapangan Municipal Disaster Risk Reduction ken Management Office (MDRRMO) – Emergency Operations Center (EOC).
Dagus a naisayangkat ti Search and Rescue operation babaen iti nagtipon a pwersa dagiti opisiales iti barangay ken responding personnel manipud iti nagduduma nga ahensiya ti nasao a munisipyo.
Pasado 2:00 p.m idi Domingo, balligi a nasarakan ti bangkay ti biktima.
Kabayatanna, impeksa dagiti maseknan a pamilya ti panagyamanda iti Kapangan MDRRMO, BFP, MERT, opisiales ti Barangay Sagubo , MDRRMO Bagulin La Union, opisiales ti Barangay Tio-angan ken amin a timmulong iti nasao nga operasyon.
Source: Bombo Radyo Baguio
