Patien ni Baguio City Mayor Benjamin B. Magalong a masapul nga agtultuloy ti panagtrabaho ti lokal a gobierno ken dagiti umili tapno mapasayaat pay ti kasasaad ti siudad iti Baguio.
Iti State of the City Address daytoy , inlawlawag ni Mayor Magalong dagiti naipatungpal ken naisayangkat a progreso ti siudad iti napalabas a tawen.
Sigun kenkuana, kayat ti siudad a mangted iti natalged, nasayaat, ken napigsa a lugar a pagnaedan, kas iti panangipaay iti patas nga oportunidad kadagiti amin nga residente.
Inwaragawag ni Mayor Magalong nga idi 2025, dimmakkel ti kita ti lokal a gobierno iti 14.4% wenno P3 biyon, manipud P2.63 bilyon idi 2019.
Maysa kadagiti kangrunaan a programa iti siudad ket ti Pansa-Nopen Tayo Circular Economy framework babaen iti Ordinance No. 69, series of 2026 no sadino naaddaan iti polisya ken programa ti siudad para iti pannakakissay iti basura ken responsable a panagusar iti resources iti publiko.
Adda met dagiti Materials Recovery Facilities wenno MRF iti innem a barangay kas pilot sites ken mannarimaan metten ti pannakaibangon ti modern waste processing facility.
Binigbig metlaeng ni Magalong a napateg ti panangsolbar iti nabayag a problema ti danum iti Baguio.
Gapu iti daytoy, impeksa ni Magalong a masapol a maaddaan iti nasaysayaat a programa ken mangipaay iti nalawlawag a dalan para pananggun-od kadagiti approvals, panangawis kadagiti investments ken panangipasdek iti water supply system a makaserbi iti siudad iti adu a dekada.
Kabayatanna, naitandudo met ti siudad kas Resilience Hub ti United Nations Office for Disaster Risk Reduction idi Marso, a mangipakita iti panagdur-as ti siudad iti disaster preparedness ken resilience.
Iti udi na, impaganetget ni Magalong a masapul a mapapigsa ti institusyon ti City Hall tapno agtalinaed dagiti reporma uray agbaliw iti administrasyon.
Source: Bombo Radyo Baguio
