Natalged a naisalakan dagiti pannakabagi ti linteg ti maysa a menor de edad kalpasan nga i-hostage ti maysa nga agtawen-iti-tallopulo ket pito a lalaki idiay Barangay Daddaay, Alilem, Ilocos Sur.
Dagus a nagresponde dagiti kameng ti Alilem Municipal Police Station kalpasan a maawatda ti report mainaig iti pasamak.
Idi nakasangpet dagiti pannakabagi ti linteg, nakitada nga adda iti uneg ti kuarto ti suspek kaduana ti ubing.
Bayat ti pannakipatang dagiti pulis iti suspek, maysa a concerned citizen ti nangawag iti naganna.
Idi kumita ti suspek iti tawa, napaspas a nagtignay dagiti pulis ket nayadayoda ti ubing manipud kenkuana.
Nadunor ti agsinnumbangir a saka ti ubing ken dagus a naipaayan iti first aid sakbay a naipan iti ospital para iti naan-anay a pannakatamingna.
Source: Bombo Radyo Vigan
