Nangipaayen ti kaskenan a tulong ti Department of Social Welfare and Development Field Office – Cordillera (DSWD FO-CAR) kadagiti naapektaran a pamilya idiay Puguis, La Trinidad kasaruno iti napasamak a panagreggaay ti daga.
Sakbay dayta, nangipatungpal pay dagitoy iti assessment iti nasao a lugar.
Pakabuklan a P25,000 cash assistance ti naipaay iti tallo a pamilya a bukbuklen ti lima nga indibidual idiay Sitio Longlong.
Maysa kadagiti balay sadiay ti nailista kas partially damaged bayat a ti dua met ti totally damaged.
Panggep ti nasao a tulong a maipaay dagiti kangrunaan ken dagos a kasapulan dagitoy bayat nga agtultuloy ti panagrecoverda manipud iti epekto ti napasamak nga insidente.
Impetteng met ti nasao nga ahensya ti kinapateg ti nasapa a panangireport dagiti epektado tapno maipaay a dagos dagiti maiyanatup nga assistance a kasapulanda.
Maguyguyugoy met dagiti dadduma pay a naapektaran iti panaglayos, landslide ken dadduma pay nga insidente gapu iti habagat ken naglabas a bagyo nga agreport kadagiti bukod da a barangay para iti validation ken assessment.
Babaen iti daytoy, naparpartak a mabigbig dagiti pamilya nga agkasapulan iti tulong ken dagos a maipaay dagiti tulong kadakuada.
Source: Bombo Radyo Baguio
