Nangipaay iti oryentasion ti Provincial Social Welfare and Development Office (PSWDO) iti 150 a kabataan iti Cagayan maipanggep iti Special Drug Education Center (SDEC), Unlad Kabataan Program (UKP), Mental Health ken Reproductive Health, ken First Aid Training kas paset ti panangselebrar iti Linggo ng Kabataan. Naisayangkat ti aktibidad idi Agosto 22, 2026 idiay Robinsons Mall, Tuguegarao City.
Pinangulowan ti PSWDO iti sidong ni Acting PSWD Officer Bonifacio Cuarteros ti aktibidad, a paset ti serye dagiti programa ti Pamahalaang Panlalawigan ti Cagayan para iti Linggo ng Kabataan. Nakipagtinnulong iti inisyatibo ni Ex-Officio Board Member Jirowell Alameda ti Local Youth Development Office (LYDO)-Cagayan iti panangidaulo ni LYDO Meynard Abram Ventura, agraman dagiti resource speakers manipud DSWD ken Provincial Health Office.
Iti mensahe ni Gobernador Edgar Aglipay, babaen ken Chief of Staff Felipe H. Buena, Jr., impaganetgetna a dagiti agtutubo ket saan laeng a masakbayan ti Cagayan no di ket pasetda met ti Cagayan ita. Iti balakadna, ti youth development ket saan laeng a panangipaay kadakuada iti aktibidad, no di ket panangbangun iti nasayaat a gobierno para iti masakbayan da.
Ti oryentasion ket tapno mapalawa ti pannakaammo, kamalayan, ken kinasagana dagiti kabataan Cagayano tapno agbalinda a responsable ken naannad a miembro ti komunidad. Babaen iti nadumaduma a topiko, naipaay kadakuada ti napateg a pannakaammo maipanggep iti panangliklik iti ilegal a droga ken dadduma pay a bisyo, pannakaaywan iti emotional ken psychological well-being, reproductive health, ken basic first aid.
Source: Cagayan Provincial Information Office
