BAGUIO CITY — Pinadayawan ni Mayor Benjamin Magalong dagiti opisyal ti barangay iti siyudad a nagtultuloy iti panaginspeksyon ken panagbantay iti tunggal komunidadda iti laksid ti napigsa a panagtudo gapu iti Tropical Depression Maymay.
Iti panaglibot ti alkalde idi Agosto 6, nakitana a nagtultuloy ti panagaksyon dagiti opisyal ti barangay iti panagmonitor iti kasasaad dagiti residente, panangipasigurado iti kinatalgedda, ken panangsungbat kadagiti kasapulanda iti tengnga ti nagtultuloy a panagtudo.
Nagpahayag iti panagyaman ni Magalong iti dedikasyon ken panangikankano dagiti opisyal, a kunana ket mangipakita iti napudno a komitmentda iti panagserbi iti publiko.
Imbaga pay ti alkalde ti kinapateg ti presensya dagiti opisyal ti barangay iti panawen ti kalamidad kas paset ti koordinasyon ken panagsagana tapno maipasigurado ti kinatalged dagiti umili ken maitag-ay ti ad-adda a napigsa ken nakasagana a Baguio.
Source: Bombo Radyo Baguio
