Inbilin ni Itogon Mayor Bernard Waclin ti panangipawil iti panangitransport iti baboy ken pork products kasaruno iti maatap nga African Swine Fever (ASF) idiay Barangay Tuding, Itogon, Benguet.
Sigun iti inpaulogna nga Executive Order No. 38- Series 2026, inbilinna ti panangipawil iti panangitransport kadagiti baboy ken dadduma pay a pork products kadagiti nagduduma a barangay, kabangibang a munisipyo, pakairamanan iti siudad ti Baguio.
Mainaig iti dayta, binilin pay ni Mayor Bernard ti Itogon Municipal Police Station nga idadauloan ni PCpt. Brett Allen Ande a mangideploy kadagiti personnel a mangikabil kadagiti checkpoints kadagiti ruta idiay Barangay Tuding ken ingetanda ti panaginspectda kadagiti mangibibiyahe kadagiti baboy wenno pork products nga awan ti Veterinary Health Certificate na ken shipping permit manipud iti Provincial/ Municipal Agriculture Office.
Nailanad pay iti nasao a direktiba a dagos a makumpiskar ken maidispose dagiti baboy wenno pork products a maala kadagiti manglabsing iti daytoy.
Sigun iti nasao nga direktiba, maibilbilin metlaeng ti nainget a koordinasyon iti nagbaetan ti Itogon Philippine National Police ken Barangay Officials ti Tuding tapno masigurado ti naurnos a pannakaiyemplementar ti nasao a direktiba.
Source: Bombo Radyo Baguio
