BAGUIO CITY – Inbaga ni Baguio City Mayor Benjamin Magalong a manamnama a malpas ti rehabilitasion ti Burnham Lake iti uneg ti dua a bulan, uray no adda pay sumagmamano a banag a masapul a maurnos sakbay a malukatan manen daytoy iti publiko.
Segun kenni Magalong, saan pay a makuntento iti kalidad dagiti material a naaramat iti metal fence iti aglawlaw ti lake, isu a pinabaliwna dagitoy. Inlawlawagna met a maapektaran ti kondisyon ti lake gapu iti bassit a pannakatudo ken limitado a danum a maiproduce ti natural spring iti baba ti lake.
Impanamnama ti alkalde a maipatungpal dagiti nangato a pagalagadan kadagiti bangka nga ag-operar iti Burnham Lake tapno mapapintas ken mapatalged ti lugar para kadagiti turista ken umili.
Ti rehabilitasion ti Burnham Lake ket nangrugi idi 2025 babaen ti pondo ti Tourism Infrastructure and Enterprise Zone Authority wenno TIEZA, kas paset ti panangsalaknib ken panangpasubli iti maysa kadagiti kangrunaan a pagturongan iti Burnham Park.
Source: Baguio PIO
