Intultuloy ti Land Transportation Office (LTO) Region 1 dagiti libre a Theoretical Driving Course (TDC) iti nadumaduma a distrito iti rehion kas paset ti panangipapigsa iti edukasion iti responsable ken natalged a panagmaneho.
Ti programa ket mangted iti kangrunaan a kaammoan maipanggep iti linteg iti kalsada, road safety, ken umno a driving etiquette para kadagiti aplikante ti student permit, nangnangruna kadagiti saan a maka-afford iti bayad dagiti pribado a driving school.
Segun iti LTO Region 1, ti libre a TDC ket mangsuporta iti direktiba ni Pangulo Ferdinand Marcos Jr. a mangipaasideg kadagiti serbisyo ti gobyerno iti publiko.
Iti pannakaidalan ni DOTr Acting Secretary Giovanni Z. Lopez ken LTO Chief Assistant Secretary Markus V. Lacanilao, impasigurado ni LTO Region 1 Regional Director Glorioso Daniel Z. Martinez a mannanayon ti panangipatungpal da kadagiti programa a mangitag-ay iti disiplina iti kalsada ken salun-at ti publiko.
Source: PIA Ilocos Region
