VIGAN CITY, Ilocos Sur (PIA) — Umabot iti 6,393 a traysikel drivers iti probinsia ti Ilocos Sur ti nakaawat iti P5,000 a Cash Relief Assistance (CRA) manipud iti Department of Social Welfare and Development (DSWD) agingga idi Mayo 13, kas paset ti programa ti gobyerno a mangsuporta kadagiti sektor a naapektaran iti agpangato a presyo ti gasolina ken bumababa a kita.
Naipatungpal daytoy babaen iti Assistance to Individuals in Crisis Situations (AICS) program, a mangipaay iti napardas a tulong pinansial kadagiti nadadael ti panagbiag gapu iti inflation ken panagngato ti gatad ti petrolyo, lalo kadagiti trabahador iti sektor ti transportasyon.
Naituloy met ti panagipaay iti ayuda idi Mayo 14 idiay dagiti ili ti Narvacan, Caoayan, San Vicente, Santa Catalina, San Esteban, ken Santiago, a nakabenepisio iti 1,956 a traysikel drivers.
Naaramid pay laeng nga ipaay ti tulong iti agarup 1,449 a drivers manipud Burgos, Cabugao, ken Santa Lucia idi Mayo 15, isu a mangipaado iti amin a benepisiario iti 9,798 a traysikel drivers iti entero a probinsia.
Segun iti DSWD, ti naurnos a panagpaay iti ayuda ket tapno masiguro ti naalisto ken natalged a distribusion iti entero a probinsia, kas bahagi ti panagresponde ti ahensia kadagiti epekto ti panagngato ti presyo ti petrolyo ken sabali pay a problema iti ekonomia.
Kinuna ni Rodel Cuyo, maysa a traysikel driver manipud Caoayan, a dakkel a tulong daytoy nga ayuda gapu ta bumaba unay ti maala da a kita iti inaldaw.
“Manipud iti agarup P600 a kita iti maysa nga aldaw, bumaba itan iti agarup P300 wenno nababbaba pay,” kinunana, nga impakaammo na pay a dumoble metten ti gasto iti gasolina.
Imbaga ti DSWD a ti AICS program ket agtalinaed a maysa kadagiti kangrunaan a programa a mangsuporta kadagiti trabahador iti informal transport sector, a saan a nalaka a makaangay kadagiti panagbalbaliw ti presyo ti petrolyo ken dagiti rigat iti ekonomia.
