Nakigtut ti maysa a ginang kalpasan na a natakuatanna ti baro a naipasngay a sanggol a naibati iti maysa a palikuran idiay Barangay Antutot, Kasibu, Nueva Vizcaya idi Domingo a malem, Abril 5, 2026. Dagus na nga impakaammo iti barangay officials ken pulis nga adda iti asideg a lugar tapno maaksyunan ti sitwasyon.
Dagiti kapulisan ti Kasibu Munical Police Station, a pinangulonaan da PCMS Darwin Corpuz ken PSSg Angelo Mark Bullong, ket dagus a rimmuar tapno tulongan ti sanggol. Naikontak met ti Municipal Disaster Risk Reduction and Management Office (MDRRMO) a nangipaay iti umuna a tulong medikal sakbay a naitugot ti ubing iti Kasibu Municipal Hospital.
Segun iti imbestigasyon ti pulisya, mapan koma a mangusar iti palikuran ti maysa a kostumer ti sari-sari store idi natakuatanna ti babai a sanggol. Nakitkita dagiti bakas ti dara ken kabaruan ti pusod, a mangipakita a sadiay met laeng ti napanaganakanna. Nabatad pay a nakabalot ti leeg ken ngiwat ti ubing iti itim a girdle a kasla pinadas a supiatan ti ariwakna.
“Nakabalot ng black na girdle yung bandang leeg at bibig ng bata para siguronhindi marinig yung pag-iyak niya,” kinuna ni PCpt Lloyd Guillermo, Hepe ti Kasibu MPS.
Iti agdama, agtultuloy ti panagimbestigar ti pulisya tapno matakuatan no siasino ti ina ti sanggol. Inawagan da met ti nagannak a asitgan da iti pulis wenno MSWD Kasibu tapno matulungan iti kasasaadna ken mapagtalkan ti masakbayan ti ubing.
Source: DWRV1233.Official and Kasibu MPS
