LAOAG CITY ā Kalikagum ni Vice Mayor Rey Carlos FariƱas a mangestablisar ti maysa pay a face recognition wenno ti pakaiyus-uswatan ti time in ken time out dagiti empleado ti Laoag City Hall.
Daytoy ket kalpasan ti pannakaobserbarna a tunggal ag-time out dagiti empleado ti lokal a gobierno ditoy siudad ti Laoag ket nakaat-atiddog ti pila dagitoy.
Inbatad ni FariƱas a no mabalin ket mangikabilda pay ti maysa tapno agsina ti face recognition para kadagiti casual ken kadagiti adda iti babaen ti legislative.
Inlawlawagna a no kastoy ket naur-urnos laeng a kitkitaen isuda ken saanda a mabayagan nga agpila.
Kabayatanna, daytoy nga addang ti Bise Mayor ket tapno al-alisto ti panag-exit dagiti empleado kangrunaanna iti panagawidda kadagiti pagtaenganda.
Source: Bombo Radyo Laoag
