BAGUIO CITY – Inpategtegedda ti panagserbi, panangipangulo ken pusoda dagiti naipili a 2026 Outstanding Women Leaders (OWLs) iti syudad ti Baguio, nangnangruna para kadagiti babbai, iti awarding program ken selebrasion ti National Women’s Month idi Marso 10 idiay Baguio Convention and Cultural Center. Iti panangawatna iti parangal iti nagan dagiti kadua na, kinuna ni Dr. Brenda Lee Atos-Villanueva a ti award ket saan laeng a tropiyo no di ket silaw a masapul a maipatuloy babaen iti panagserbi iti komunidad. Kadua na dagiti nagun-od iti parangal a da Purificacion Suanding Molintas, Purita Ordonio Pacial, ken Atty. Cherry Daytec Yangot.
Imbingay ni Atos-Villanueva a kas simbolo ti owl, masapul a maadda ti nalawag a panangkita tapno matakuatan dagiti kasapulan a saan a mapansin, ken ti kinapigsa a mangidalan iti panagbalbaliw ken baro a rugi. Inlawlawagna met a ti kultura ket saan laeng a maipakita iti moda wenno inabel, no di ket iti panagkaykaysa dagiti artista, agaramid iti moda, ken komunidad a mangtulong iti creative economy ti syudad. Kas maysa a doktora ken aktibo iti larangan ti arte, ipakitana ti kinapateg ti panagkaykaysa ti salun-at ken kultura.
Iti agdama, nakatutok ni Atos-Villanueva iti medikal a panagserbi babaen iti “Basic Meds on Wheels” ken outreach programs, ngem inyegna latta ti ayatna iti kultura ken komunidad. Kinunana a ti pudno a panagserbi ket saan laeng a panangagas iti bagi no di ket panangpabileg iti kararrua ti syudad, a pakairamanan dagiti mannalon iti arte. Ti OWLs Awards, a mangrugi iti maika-20 a tawenna, ket agtultuloy a mangrekognisar kadagiti babbai a lider a mangipangpangruna iti nagduduma a sektor, a mangtulong iti pannakapigsa ti gender equality ken inclusive a sosiedad.
Source: Baguio City Public Information Office
