Natay ti maysa nga 18-anyos nga estudyante kalpasan a nalmes iti Cagayan River a sakop ti Barangay Chica idiay Cauayan City, Isabela, iti agarup ala-una ti malem idi Sabado, Marso 14, 2026, kas iti paunang imbestigasyon dagiti otoridad.
Ti biktima ket napanagan iti alyas “John,” maysa a Senior High School student ken residente iti Barangay Duminit iti nasao a siudad. Segun iti imbestigasyon dagiti pulis, nagturong ti biktima iti karayan kadua dagiti kaklasena tapno agdigus sakbay a mangaramidda koma iti proyekto para iti maysa a subject.
Istorya met ti maysa kadagiti kaklase, agarup 20 minutos dan a naglublubog iti danum idi napasamak ti insidente. Kabayatan a isu ket agsu-sukat ti shorts na, aksidente a naawan iti balanse ti biktima ken natnag iti naun-uneg a paset ti karayan.
Gapu iti kinadagsen ti agayus a danum ken kinanauneg ti lugar, narigatan a nanglangoy ti biktima agingga a nalmes. Dagiti kaklase-na ket dagus a nangsapul iti tulong iti maysa a barangay tanod a mangimando iti trapiko iti Alicaocao Overflow Bridge.
Babaen iti napaspas a panagresponde dagiti otoridad ken residente iti lugar, narekober ti biktima ken dagus a naipan iti maysa a pribado nga ospital iti siudad.
Nupay kasta, napanawan met laeng ti biktima iti biag kalpasan ti pannakaidalan iti ospital. Iti agdama, ipapaay dagiti otoridad ti panangliwliwa iti pamilya ti biktima ken ipalpalagip da iti publiko, nangruna kadagiti agtutubo, ti kinapateg ti panagannad ken panagsurot iti safety measures no agdigus iti karayan wenno sabali pay a lugar a danum.
Source: XFM Santiago
